X 293)            . ' SOUS LE RÈGNE DE CHARLES VI.                                    53
soient et appartiengnent à Jehan et Arnaut, mes nepveux, filz du dit Thomas, à partir egalment entre eulx; et que damoiselle Marguerite, leur suer, ma niepce, fille du dit Thomas, soit contente de ce que je lui ay donné à son mariage avec son mari Guillaume de Gamaches, selon la forme et teneur du traictié fait du dit mariage, dont lettres ont esté faictes et passées soubz le seel du Chastellet de Paris. Et en oultre, je laisse à la dicte damoiselle Marguerite la somme de deux mil frans d'or, pour estre employez en heritage, qui sera heritage d'elle, de ses hoirs et ayans cause et descendans, de mon costé et ligne.
Item, je veulx et ordene que ma suer, damoiselle Marguerite de Cresecques, femme de feu Thomas de Corbye, mon frere, ou temps qu'il vivoit, oultre ce que je lui ay laissié et ordené par mon dit tes­tament, ait et preingne cent livres Parisis à heritage, et deux cens livres Parisis à vie; et avec ce mil et cinq cens frans d'or, pour emploier à cent livres Parisis de rente, dont elle joyra, sa vie durant, afin qu'elle ait sur tout six cens livres Parisis de rente, ainsi que Thomas, mon frere, lui a ordené en son testament, et que mes nepveux, ses enfans, soient tenuz, ou mes executeurs, de les lui asseoir bien et convenablement, ou cas que je ne les y auroye assises à mon vivant.
Item, je veulx et ordene que la chapelle que j'ay fait commencer à édifier en l'eglise de Saint Ypolite de Beauvais soit parfaicte et achevée, bien et convenablement garnie de livres, calices et aournemens, pour faire le service et autres choses necessaires à la dicte chapelle.
Item, que la dicte chapelle soit fondée de soixante livres Parisis de rente, admorties bien et souffisamment. Desqueles lx livres Parisis, il y en aura les cinquante livres Parisis pour le chapelain qui sera ordené pour la dicte chapelle desservir; lequel Chapellain sera tenu de dire messe chascun jour en la dicte chapelle, pour prier pour les ames de moy, de mon pere, de ma mere, de mes freres et suers et de mes autres amis et bienfaicteurs. Et les autres dix livres Parisis seront pour soustenir la dicte chapelle [de] livres, aournemens et autres choses appartenantes à ycelle, ou cas toutevoyes que je n'auroie acompli les choses dessus dictes, touchans la dicte chapelle, à mon vivant.